काठमाडौँ :- आगामी फागुन २१ गते हुने प्रतिनिधिसभा सदस्य निर्वाचनअन्तर्गत प्रत्यक्षतर्फ देशभरका सबै १६५ निर्वाचन क्षेत्रमा आज उत्साहपूर्ण रुपमा उम्मेदवारी मनोनयन दर्ता भएको छ । निर्वाचन आयोगले बिहान १० बजेदेखि अपरान्ह ५ बजेसम्म मनोनयन दर्ताको समय तोकेको थियो । आयोगका अनुसार तोकिएको समयसीमाभित्र निर्वाचन अधिकृतको कार्यालयमा प्रवेश गरेका उम्मेदवारले त्यसपछि पनि मनोनयन दर्ता गर्न पाएका थिए ।
निर्वाचन आयोगले दिएको जानकारीअनुसार बेलुकी ६ बजेसम्ममा कुल २ हजार ९२५ जनाले उम्मेदवारी दर्ता गराएका छन् । मनोनयन दर्ता सम्पन्न भएपछि आयोजित पत्रकार सम्मेलनमा कार्यवाहक प्रमुख निर्वाचन आयुक्त रामप्रसाद भण्डारीले देशैभर उत्साहपूर्ण वातावरणमा उम्मेदवारी दर्ता भएको बताउँदै बाँकी निर्वाचन कार्यतालिका अनुसार प्रक्रिया अघि बढाइने जानकारी दिनुभयो ।
आयोगका सचिव कृष्णबहादुर राउतले आयोगको प्रणालीअनुसार ३३६ महिला र २ हजार ५८९ पुरुष उम्मेदवारले मनोनयन दर्ता गराएको जानकारी दिनुभयो । उहाँका अनुसार केही निर्वाचन क्षेत्रमा मनोनयनपत्रको रुजु गर्ने काम जारी छ । सबैभन्दा कम उम्मेदवारी दर्ता भएको जिल्ला मुस्ताङमा चार जना र मनाङमा पाँच जनाले उम्मेदवारी दर्ता गराएका छन् । यी दुवै जिल्लामा रुजु प्रक्रिया सम्पन्न भइसकेको जनाइएको छ ।
सबैभन्दा बढी उम्मेदवारी दर्ता भएको रुपन्देही निर्वाचन क्षेत्र नं २ र ३ मा ३५/३५ जनाले मनोनयन दर्ता गराएका छन् । रुपन्देही–२ को रुजु प्रक्रिया पूरा भइसकेको छ भने निर्वाचन क्षेत्र नं ३ मा बाँकी रहेको छ ।
निर्वाचन आयोगका अनुसार मनोनयन दर्ताको कार्य सामान्यतया शान्तिपूर्ण रुपमा सम्पन्न भएको छ । निर्वाचन कार्यतालिकाअनुसार माघ ७ गते बिहान १० बजेदेखि दिउँसो ३ बजेसम्म उम्मेदवारविरुद्ध उजुरी दिन सकिनेछ । माघ ७ गते दिउँसो ३ बजेदेखि माघ ८ गते बेलुकी ५ बजेसम्म उजुरीमाथि जाँचबुझ तथा निर्णय गरी सोही दिन बेलुकी उम्मेदवारको नामावली प्रकाशन गरिनेछ ।
यसैगरी, माघ ९ गते बिहान १० बजेदेखि दिउँसो १ बजेसम्म उम्मेदवारले नाम फिर्ता लिन सक्नेछन् । सोही दिन दिउँसो १ बजेदेखि ३ बजेसम्म अन्तिम नामावली प्रकाशन गरी दिउँसो ४ बजेदेखि साँझ ७ बजेसम्म उम्मेदवारलाई निर्वाचन चिह्न प्रदान गरिने निर्वाचन आयोगले जनाएको छ ।
तपाईको प्रतिक्रिया
